ದುಬೈ ಏರ್ ಶೋ 2025ರ ಹಾರಾಟ ಪ್ರದರ್ಶನದ ಸಮಯದಲ್ಲಿ ಭಾರತೀಯ ವಾಯುಪಡೆಯ ತೇಜಸ್ ಯುದ್ಧ ವಿಮಾನ ಅಪಘಾತಕ್ಕೀಡಾಗಿ ಪೈಲಟ್ ಸಾವನ್ನಪ್ಪಿದ್ದಾರೆ.
ನವೆಂಬರ್ 17 ರಂದು ಪ್ರಾರಂಭವಾದ ಏರ್ ಶೋನ ಪ್ರದರ್ಶನ ಕೊನೆಯ ದಿನವಾದ ಇಂದು ಈ ದುರ್ಘಟನೆ ನಡೆದಿದೆ. ಮಧ್ಯಾಹ್ನ 2:10 ರ ಸಮಯ ದುಬೈ ವಾಯು ಪ್ರದರ್ಶನದ ಹಾರಾಟದ ಸಂದರ್ಭದಲ್ಲಿ ತೇಜಸ್ ಯುದ್ಧ ವಿಮಾನ ಅಪಘಾತಕ್ಕೀಡಾಗಿದ್ದು, ಜನಸಮೂಹ ನೋಡುತ್ತಿದ್ದಂತೆ ಅಲ್ ಮಕ್ತೌಮ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ದಟ್ಟವಾದ ಕಪ್ಪು ಹೊಗೆ ಆವರಿಸಿದೆ. ಅಪಘಾತದಲ್ಲಿ ಪೈಲಟ್ ಸಾವನ್ನಪ್ಪಿದ್ದಾರೆ ಎಂದು ಭಾರತೀಯ ವಾಯುಪಡೆ (ಐಎಎಫ್) ದೃಢಪಡಿಸಿದೆ.ಅಪಘಾತದ ಕಾರಣವನ್ನು ಕಂಡುಹಿಡಿಯಲು ತನಿಖಾ ನ್ಯಾಯಾಲಯವನ್ನು ರಚಿಸುವುದಾಗಿ ಘೋಷಿಸಿದೆ.
ಅಗ್ನಿಶಾಮಕ ಮತ್ತು ತುರ್ತು ತಂಡಗಳು ಘಟನೆಗೆ ತ್ವರಿತವಾಗಿ ಪ್ರತಿಕ್ರಿಯಿಸಿವೆ ಮತ್ತು ಪ್ರಸ್ತುತ ಸ್ಥಳದಲ್ಲಿ ಪರಿಸ್ಥಿತಿಯನ್ನು ನಿರ್ವಹಿಸುತ್ತಿವೆ ಎಂದು ದುಬೈನ ಮಾಧ್ಯಮ ಕಚೇರಿ ತಿಳಿಸಿದೆ.
ಇದು 2ನೇ ತೇಜಸ್ ಯುದ್ಧ ವಿಮಾನದ ಅಪಘಾತವಾಗಿದೆ ಈ ಮೊದಲು IAF ನ ತೇಜಸ್ ಲಘು ಯುದ್ಧ ವಿಮಾನ (LCA) ಮಾರ್ಚ್ 12, 2024 ರಂದು ಜೈಸಲ್ಮೇರ್ನಲ್ಲಿ ಕಾರ್ಯಾಚರಣೆಯ ತರಬೇತಿ ಹಾರಾಟದ ಸಮಯದಲ್ಲಿ ಅಪಘಾತಕ್ಕೀಡಾಗಿತ್ತು.
ಈ ಸ್ವದೇಶಿ ನಿರ್ಮಿತ ಜೆಟ್ 24 ವರ್ಷಗಳ ಹಿಂದೆ ಜನವರಿ 04, 2001ರಂದು ತನ್ನ ಮೊದಲ ಹಾರಾಟವನ್ನು ಮಾಡಿತು. ಲಘು ಯುದ್ಧ ವಿಮಾನ (LCA)-ತೇಜಸ್ ಅನ್ನು 1984 ರಲ್ಲಿ ಪರಿಕಲ್ಪನೆ ಮಾಡಲಾಯಿತು. ಸ್ವದೇಶಿ ಸಿಂಗಲ್ ಎಂಜಿನ್ 4.5 ತಲೆಮಾರಿನ ಬಹು-ಪಾತ್ರದ ಯುದ್ಧ ವಿಮಾನವನ್ನು ಮೇ 2003 ರಲ್ಲಿ ಅಂದಿನ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರು ‘ತೇಜಸ್’ ಎಂದು ನಾಮಕರಣ ಮಾಡಿದರು.