ರಿಯಾದ್ : ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಮತ್ತು ಸಂಜಯ್ ದತ್ ಮುಂಬರುವ ಸೌದಿ ಆಕ್ಷನ್ ಚಿತ್ರ ‘7 ಡಾಗ್ಸ್’ ನಲ್ಲಿ ಕಾಣಿಸಿಕೊಂಡಿದ್ದು, ಚಿತ್ರದ ಟ್ರೇಲರ್ ಈಗ ಬಿಡುಗಡೆಯಾಗಿದೆ. ಈ ಚಿತ್ರವನ್ನು ಆದಿಲ್ ಎಲ್ ಅರ್ಬಿ ಮತ್ತು ಬಿಲಾಲ್ ಫಲ್ಲಾ ಜಂಟಿಯಾಗಿ ನಿರ್ದೇಶಿಸಿದ್ದಾರೆ. ಪ್ರಸ್ತುತ ಚಿತ್ರೀಕರಣ ಸೌದಿಯ ಹೊಸದಾಗಿ ತೆರೆಯಲಾದ ಅಲ್ ಉಲಾ ಸ್ಟುಡಿಯೋದಲ್ಲಿ ನಡೆಯುತ್ತಿದೆ.
ವರದಿಗಳ ಪ್ರಕಾರ, ಈ ನಟರು ಹಾಲಿವುಡ್ ಚಿತ್ರವೊಂದರ ಅತಿಥಿ ಪಾತ್ರದಲ್ಲಿ ನಟಿಸುತ್ತಿದ್ದಾರೆ, ಇದು 2021ರ ಅರ್ಜೆಂಟೀನಾದ ಚಲನಚಿತ್ರ ಸೆವೆನ್ ಡಾಗ್ಸ್ ನ ರಿಮೇಕ್ ಆಗಲಿದೆ. ದಿ 7ಡಾಗ್ಸ್ ಚಿತ್ರದಲ್ಲಿ ಈಜಿಪ್ಟ್ ನಟರಾದ ಕರೀಮ್ ಅಬ್ದೆಲ್-ಅಜೀಜ್ ಮತ್ತು ಅಹ್ಮದ್ ಎಜ್ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ.
ಅಂತರರಾಷ್ಟ್ರೀಯ ಅಪರಾಧದ ಹಿನ್ನೆಲೆಯಲ್ಲಿ ಹೆಣೆಯಲಾದ ಈ ಚಿತ್ರವು, ಕುಖ್ಯಾತ 7 ಡಾಗ್ಸ್ ಸಿಂಡಿಕೇಟ್ನ ಹಿರಿಯ ಸದಸ್ಯ ಘಾಲಿ ಅಬು ದಾವೂದ್ (ಅಜೀಜ್) ನನ್ನು ಬಂಧಿಸುವ ಇಂಟರ್ಪೋಲ್ ತನಿಖಾಧಿಕಾರಿ ಖಾಲಿದ್ ಅಲ್-ಅಜ್ಜಿ (ಎಜ್) ಮೇಲೆ ಕೇಂದ್ರೀಕೃತವಾಗಿದೆ ಎಂದು ಹೇಳಲಾಗಿದೆ. ಮತ್ತು ಇದು ಮಧ್ಯಪ್ರಾಚ್ಯವನ್ನು ಪ್ರವಾಹದಂತೆ ಆವರಿಸಿರುವ ಮಾರಕ ಮಾದಕ ವಸ್ತುವಿನ ವಿರುದ್ಧದ ಹೋರಾಟವನ್ನು ಆಧರಿಸಿದೆ.
ಸೌದಿ ಅರೇಬಿಯಾದ ಜನರಲ್ ಎಂಟರ್ಟೈನ್ಮೆಂಟ್ ಅಥಾರಿಟಿಯ ಅಧ್ಯಕ್ಷ ಟರ್ಕಿ ಅಲ್-ಶೇಖ್ ಈ ಕಥೆಯನ್ನು ಬರೆದಿದ್ದಾರೆ. ಈ ಚಿತ್ರವು ಈ ವರ್ಷದ ಕೊನೆಯಲ್ಲಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
