ಮಡಿಕೇರಿ : ಕೊಡಗು ಜಿಲ್ಲೆಯ ಪ್ರಸಿದ್ಧ ಚಾರಣ ತಾಣ ತಡೆಯಂಡಮೋಳ ಬೆಟ್ಟದಲ್ಲಿ ನಿಗೂಢವಾಗಿ ನಾಪತ್ತೆಯಾಗಿದ್ದ ಕೇರಳ ಮೂಲದ ಐಟಿ ಉದ್ಯೋಗಿ ಶರಣ್ಯ (27) ನಾಲ್ಕು ದಿನಗಳ ಸತತ ಶೋಧ ಕಾರ್ಯಾಚರಣೆಯ ಬಳಿಕ ಪತ್ತೆಯಾಗಿದ್ದಾರೆ. ಸ್ಥಳೀಯರು, ಪೊಲೀಸರು, ಅರಣ್ಯ ಇಲಾಖೆ ಸಿಬ್ಬಂದಿ, ಡ್ರೋನ್ ಮತ್ತು ಶ್ವಾನ ದಳದ ಸಂಘಟಿತ ಪ್ರಯತ್ನದಿಂದ ಈ ರಕ್ಷಣಾ ಕಾರ್ಯಾಚರಣೆ ಯಶಸ್ವಿಯಾಗಿದೆ.
ಕೇರಳದ ಎರ್ನಾಕುಲಂ ಮೂಲದ ಐಟಿ ವೃತ್ತಿಪರರಾದ ಶರಣ್ಯ ಅವರು ತಮ್ಮ ಸ್ನೇಹಿತರ ತಂಡದೊಂದಿಗೆ ಏಪ್ರಿಲ್ 1 ರಂದು ಕೊಡಗು ಜಿಲ್ಲೆ ತಡೆಯಂಡಮೋಳ ಬೆಟ್ಟಕ್ಕೆ ಚಾರಣಕ್ಕೆಂದು ತೆರಳಿದ್ದರು. ಸುಮಾರು 1,745 ಮೀಟರ್ ಎತ್ತರದ ಈ ಬೆಟ್ಟವು ಕರ್ನಾಟಕದ ಮೂರನೇ ಅತಿ ಎತ್ತರದ ಶಿಖರವಾಗಿದೆ. ಚಾರಣದ ವೇಳೆ ತಂಡದಿಂದ ಬೇರ್ಪಟ್ಟ ಶರಣ್ಯ ಅವರು ಕಾಡಿನ ಮಧ್ಯೆ ದಾರಿ ತಪ್ಪಿದ್ದರು. ಮೊಬೈಲ್ ನೆಟ್ವರ್ಕ್ ವ್ಯಾಪ್ತಿಯಿಲ್ಲ. ಸಹಾಯಕ್ಕಾಗಿ ಕೂಗಿದರೂ ಪ್ರತಿಕ್ರಿಯೆ ಸಿಗಲಿಲ್ಲ.
ದಣಿದು ಸುಸ್ತಾಗಿದ್ದ ಅವರು ಬೆಟ್ಟದ ಇಳಿಜಾರಿನಲ್ಲಿ ಪಾಳು ಬಿದ್ದ ಒಂದು ಹಳೆಯ ಬಂಗಲೆಯನ್ನು ಕಂಡುಕೊಂಡಿದ್ದು, ಅಲ್ಲಿಯೇ ನಾಲ್ಕು ದಿನಗಳ ಹಸಿವು ಮತ್ತು ಬಳಲಿಕೆಯ ನಡುವೆ ಆಶ್ರಯ ಪಡೆದರು. ಕುಡಿಯಲು ಸ್ವಲ್ಪ ನೀರಿತ್ತು, ಯಾವುದೇ ಆಹಾರವಿಲ್ಲದೆ ಬದುಕುಳಿದಿದ್ದಾರೆ.
ಶರಣ್ಯ ಅವರು ಗುರುವಾರ ಸಂಜೆಯಿಂದ ನಾಪತ್ತೆಯಾಗಿರುವುದು ಗಮನಕ್ಕೆ ಬಂದ ತಕ್ಷಣ ಸ್ಥಳೀಯ ಪೊಲೀಸರು ಮತ್ತು ಅರಣ್ಯ ಇಲಾಖೆ ಸಿಬ್ಬಂದಿ ಹುಡುಕಾಟ ನಡೆಸಲು ಮುಂದಾಗಿದ್ದು, ಮೊದಲ ಎರಡು ದಿನಗಳಲ್ಲಿ ಸುಮಾರು 50ಕ್ಕೂ ಹೆಚ್ಚು ಸಿಬ್ಬಂದಿ ಬೆಟ್ಟದ ವಿವಿಧ ಭಾಗಗಳಲ್ಲಿ ಹುಡುಕಲಾಗಿದೆ. ಆದರೆ ಯಾವುದೇ ಸುಳಿವು ಸಿಗಲಿಲ್ಲ. ಆತಂಕ ಹೆಚ್ಚಾದಂತೆ, ಅರಣ್ಯ ಇಲಾಖೆ ಡ್ರೋನ್ ಮತ್ತು ಶ್ವಾನ ದಳವನ್ನು ಕೂಡ ಬಳಸಿಕೊಳ್ಳಲು ನಿರ್ಧರಿಸಿತು. ಸ್ಥಳೀಯ ಗ್ರಾಮಸ್ಥರು, ಗೈಡುಗಳು ಮತ್ತು ಹೋಂಸ್ಟೇ ನಿರ್ವಾಹಕರು ಸ್ವಯಂಪ್ರೇರಿತರಾಗಿ ಹುಡುಕಾಟಕ್ಕೆ ಸೇರಿದ್ದಾರೆ.
ಭಾನುವಾರ ಮುಂಜಾನೆ, ಕಬ್ಬಿನಕಾಡು ಪ್ರದೇಶದ ಸ್ಥಳೀಯ ಬೆಟ್ಟದ ದೂರದ ಭಾಗದಲ್ಲಿ ದಟ್ಟ ಕಾಡಿನ ನಡುವೆ ಪಾಳು ಬಂಗಲೆ ಸಮೀಪ ಶರಣ್ಯ ಅವರು ಕುಳಿತಿದ್ದಾರೆ. ತಕ್ಷಣ ಪೊಲೀಸರಿಗೆ ಮಾಹಿತಿ ನೀಡಲಾಯಿತು. ರಕ್ಷಣಾ ತಂಡಕ್ಕೆ ದೌಡಾಯಿಸಿ, ಶರಣ್ಯ ಅವರನ್ನು ಸುರಕ್ಷಿತವಾಗಿ ರಕ್ಷಿಸಿದ್ದಾರೆ.