ಆಫ್ರಿಕಾದಲ್ಲಿ ಅಡಗಿದ್ದ ಐಸಿಸ್ ಭಯೋತ್ಪಾದಕ ಅಬು ಬಿಲಾಲ್ ಅಲ್-ಮಿನುಕಿ ಹತ್ಯೆ: ಅಮೆರಿಕ-ನೈಜೀರಿಯಾ ಜಂಟಿ ಕಾರ್ಯಾಚರಣೆ

ನೈಜೀರಿಯಾ : ಅಮೆರಿಕ ಮತ್ತು ನೈಜೀರಿಯಾ ಪಡೆಗಳ ಜಂಟಿ ಕಾರ್ಯಾಚರಣೆಯಲ್ಲಿ, ಇಸ್ಲಾಮಿಕ್ ಸ್ಟೇಟ್ (ISIS) ನ ಎರಡನೇ ಅತ್ಯುನ್ನತ ಕಮಾಂಡರ್ ಅಬು-ಬಿಲಾಲ್ ಅಲ್-ಮಿನುಕಿಯನ್ನು ಹತ್ಯೆ ಮಾಡಲಾಗಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದರು.

ಟ್ರಂಪ್ ತಮ್ಮ ಸಾಮಾಜಿಕ ಮಾಧ್ಯಮ ವೇದಿಕೆ “ಟ್ರುತ್ ಸೋಶಿಯಲ್” ನಲ್ಲಿ ಈ ಕಾರ್ಯಾಚರಣೆಯನ್ನು ತಮ್ಮ ನಿರ್ದೇಶನದ ಮೇರೆಗೆ ನಡೆಸಲಾಯಿತು ಎಂದು ಹೇಳಿದ್ದಾರೆ. ಇದನ್ನು ಅಮೆರಿಕ ಮತ್ತು ನೈಜೀರಿಯಾ ಪಡೆಗಳು ಜಂಟಿಯಾಗಿ ನಡೆಸಿದ ಅತ್ಯಂತ ಸಂಕೀರ್ಣ ಮತ್ತು ಎಚ್ಚರಿಕೆಯಿಂದ ಯೋಜಿಸಲಾದ ಕಾರ್ಯಾಚರಣೆ ಎಂದು ಅವರು ಬಣ್ಣಿಸಿದ್ದಾರೆ.

ಟ್ರಂಪ್ ಪ್ರಕಾರ ಅಬು ಬಿಲಾಲ್ ಅಲ್ – ಮಿನುಕಿ  ಐಸಿಸ್‌ನ ಉನ್ನತ ಶ್ರೇಣಿಯ ಭಯೋತ್ಪಾದಕನಾಗಿದ್ದು ಐಸಿಸ್‌ನ ಜಾಗತಿಕ ಸೆಕೆಂಡ್-ಇನ್-ಕಮಾಂಡ್ ಆಗಿ ಸೇವೆ ಸಲ್ಲಿಸಿದ್ದ. ಅವನನ್ನು ಅಬು ಬಕರ್ ಇಬ್ನ್ ಮುಹಮ್ಮದ್ ಇಬ್ನ್ ಅಲಿ ಅಲ್-ಮನುಕಿ ಎಂದೂ ಕರೆಯಲಾಗುತ್ತಿತ್ತು. ಆಫ್ರಿಕಾದಲ್ಲಿ ಐಸಿಸ್‌ನ ಅತ್ಯಂತ ಸಕ್ರಿಯ ಭಯೋತ್ಪಾದಕನಾಗಿದ್ದು, ಹಲವಾರು ದಾಳಿಗಳನ್ನು ಯೋಜಿಸುವಲ್ಲಿ ಭಾಗಿಯಾಗಿದ್ದ. ಅವನ ಸಾವು ಐಸಿಸ್‌ನ ಜಾಗತಿಕ ಜಾಲಕ್ಕೆ ದೊಡ್ಡ ಹೊಡೆತ ನೀಡಿದೆ. ಆಫ್ರಿಕಾದ ಮೂಲಗಳಿಂದ ಅವನ ಅಡಗುತಾಣದ ಬಗ್ಗೆ ಯುಎಸ್ ಮಿಲಿಟರಿಗೆ ನಿಖರವಾದ ಮಾಹಿತಿ ಇತ್ತು, ಅದು ಈ ಕಾರ್ಯಾಚರಣೆಯನ್ನು ಸಾಧ್ಯವಾಗಿಸಿತು ಎಂದು ಟ್ರಂಪ್ ಹೇಳಿಕೊಂಡರು.

ಈ ಕಾರ್ಯಾಚರಣೆಯ ನಂತರ, ಆಫ್ರಿಕಾ ಮತ್ತು ಜಾಗತಿಕವಾಗಿ ಐಸಿಸ್ ಚಟುವಟಿಕೆಗಳು ಗಮನಾರ್ಹವಾಗಿ ದುರ್ಬಲಗೊಳ್ಳುತ್ತವೆ ಮತ್ತು ಭಯೋತ್ಪಾದಕ ಜಾಲವು ದೊಡ್ಡ ಹಾನಿಯನ್ನು ಅನುಭವಿಸಿದೆ ಎಂದು ಹೇಳಲಾಗುತ್ತಿದೆ.