ಮಸ್ಕತ್ : ಓಮನ್ ಕ್ರಿಕೆಟ್ ಮಂಡಳಿಯು 2025 ರ ಏಷ್ಯಾಕಪ್ ಗಾಗಿ ಓಮನ್ ಕ್ರಿಕೆಟ್ ತಂಡವನ್ನು ಪ್ರಕಟಿಸಿದೆ. ಜತಿಂದರ್ ಸಿಂಗ್ ನಾಯಕತ್ವದಲ್ಲಿ 17 ಸದಸ್ಯರ ತಂಡವನ್ನು ಘೋಷಿಸಲಾಗಿದೆ. ಏಷ್ಯಾದ ಈ ಅತಿದೊಡ್ಡ ಮತ್ತು ಪ್ರತಿಷ್ಠಿತ ಕ್ರಿಕೆಟ್ ಟೂರ್ನಮೆಂಟ್ಗೆ ಆಯ್ಕೆಯಾದ ಓಮನ್ ತಂಡದಲ್ಲಿ 5 ಮಂದಿ ಭಾರತೀಯ ಮೂಲದ ಆಟಗಾರರಿಗೆ ಅವಕಾಶ ನೀಡಲಾಗಿದೆ.ಅಲ್ಲದೆ 4ಮಂದಿ ಹೊಸ ಆಟಗಾರರಾದ ಸುಫಿಯಾನ್ ಯೂಸುಫ್, ಜಿಕ್ರಿಯ ಇಸ್ಲಾಂ, ಫೈಸಲ್ ಶಾ ಮತ್ತು ನದೀಮ್ ಖಾನ್ ಅವರನ್ನು ಮೊದಲ ಬಾರಿಗೆ ತಂಡದಲ್ಲಿ ಸೇರಿಸಿಕೊಳ್ಳಲಾಗಿದೆ. ಓಮನ್ ತಂಡವು ಅನುಭವಿ ಮತ್ತು ಯುವ ಆಟಗಾರರ ಸಮತೋಲನವನ್ನು ಹೊಂದಿದೆ.
ತಂಡದ ಘೋಷಣೆಯ ನಂತರ, ಮುಖ್ಯ ಕೋಚ್ ದಿಲೀಪ್ ಮೆಂಡಿಸ್, “ನಾವು ಏಷ್ಯಾ ಕಪ್ನಲ್ಲಿ ಭಾಗವಹಿಸುತ್ತಿದ್ದೇವೆ. ಇದು ಒಂದು ದೊಡ್ಡ ಟೂರ್ನಮೆಂಟ್, ಇದು ನಮ್ಮ ಆಟಗಾರರಿಗೆ ಜಾಗತಿಕ ವೇದಿಕೆಯಲ್ಲಿ ತಮ್ಮ ಕೌಶಲ್ಯಗಳನ್ನು ಪ್ರದರ್ಶಿಸಲು ಉತ್ತಮ ಅವಕಾಶವನ್ನು ನೀಡುತ್ತದೆ. ಟಿ20 ಪಂದ್ಯದಲ್ಲಿ ಏನು ಬೇಕಾದರೂ ಆಗಬಹುದು. ಒಂದು ಅದ್ಭುತ ಓವರ್ ಎಲ್ಲವನ್ನೂ ಬದಲಾಯಿಸಬಹುದು. ನಮ್ಮ ತಯಾರಿ ಬಲವಾಗಿದೆ. ಅಗ್ರ ತಂಡಗಳ ವಿರುದ್ಧದ ಪಂದ್ಯಗಳಲ್ಲಿ ಮಾನಸಿಕ ಶಕ್ತಿಯೂ ಅಷ್ಟೇ ಮುಖ್ಯ. ಭಾರತ ಮತ್ತು ಪಾಕಿಸ್ತಾನದಂತಹ ತಂಡಗಳ ವಿರುದ್ಧ ಆಡುವುದು ಯಾವಾಗಲೂ ರೋಮಾಂಚನಕಾರಿಯಾಗಿದೆ. ಈ ಏಷ್ಯಾ ಕಪ್ನಲ್ಲಿ ಪ್ರಭಾವ ಬೀರಲು ಮತ್ತು ಓಮನ್ ಅನ್ನು ಉದಯೋನ್ಮುಖ ಕ್ರಿಕೆಟ್ ರಾಷ್ಟ್ರವಾಗಿ ಪ್ರದರ್ಶಿಸಲು ನಾವು ಆಶಿಸುತ್ತೇವೆ” ಎಂದು ಹೇಳಿದರು
2025 ರ ಏಷ್ಯಾ ಕಪ್ನಲ್ಲಿ, ಓಮನ್ ತಂಡವು ಭಾರತ, ಪಾಕಿಸ್ತಾನ ಮತ್ತು ಯುಎಇ ಜೊತೆಗೆ ಗ್ರೂಪ್ ಎ ನಲ್ಲಿ ಸ್ಥಾನ ಪಡೆದಿದೆ.
ಭಾರತೀಯ ಮೂಲದ ಜತಿಂದರ್ ಸಿಂಗ್ ಒಮಾನ್ ನಾಯಕತ್ವ
ಜತಿಂದರ್ ಸಿಂಗ್ 2003 ರಲ್ಲಿ ತಮ್ಮ ಕುಟುಂಬದೊಂದಿಗೆ ಒಮಾನ್ಗೆ ಸ್ಥಳಾಂತರಗೊಂಡರು. ಅದಕ್ಕೂ ಮೊದಲು, ಅವರ ತಂದೆ ಗುರ್ಮೈಲ್ ಸಿಂಗ್ 1975 ರಲ್ಲಿ ಅಲ್ಲಿಗೆ ಹೋಗಿದ್ದರು. ಅವರು ರಾಯಲ್ ಓಮನ್ ಪೊಲೀಸರಲ್ಲಿ ಕಾರ್ಪೆಂಟರ್ (ಬಡಗಿ) ಯಾಗಿ ಕೆಲಸ ಮಾಡುತ್ತಿದ್ದರು. ಜತಿಂದರ್ ಮಸ್ಕತ್ನಲ್ಲಿ ತಮ್ಮ ಅಧ್ಯಯನವನ್ನು ಪ್ರಾರಂಭಿಸಿದರು ಮತ್ತು ಅವರ ಕ್ರಿಕೆಟ್ ವೃತ್ತಿಜೀವನ ಅಲ್ಲಿಂದ ಪ್ರಾರಂಭವಾಯಿತು. ಜತಿಂದರ್ ಅವರನ್ನು ಓಮನ್ನ 19 ವರ್ಷದೊಳಗಿನವರ ತಂಡದಲ್ಲಿ ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಆಗಿ ಸೇರಿಸಲಾಯಿತು ಮತ್ತು 2015 ರಲ್ಲಿ ಅವರು ಓಮನ್ ತಂಡದಲ್ಲಿ ಸ್ಥಾನ ಪಡೆದರು, ಅಲ್ಲಿ ಅವರು ಡಬ್ಲಿನ್ನಲ್ಲಿ ಅಫ್ಘಾನಿಸ್ತಾನದ ವಿರುದ್ಧ ಪಾದಾರ್ಪಣೆ ಮಾಡಿದರು. ಕ್ರಿಕೆಟಿಗರಾದ ನಂತರ ಜತಿಂದರ್ ಸಿಂಗ್ ಅವರ ಜೀವನವು ಭಾರತೀಯ ಆಟಗಾರರಂತೆ ಬದಲಾಗಲಿಲ್ಲ. ಅವರು ಓಮನ್ನ ಪ್ರಸಿದ್ಧ ಕಂಪನಿ ಖಿಮ್ಜಿ ರಾಮದಾಸ್ನ ಮಾರಾಟ ವಿಭಾಗದಲ್ಲಿ ಕೆಲಸ ಮಾಡುತ್ತಿದ್ದಾರೆ.
ಏಷ್ಯಾ ಕಪ್ಗಾಗಿ ಓಮನ್ ತಂಡ
ಜತೀಂದರ್ ಸಿಂಗ್ (ನಾಯಕ), ಹಮ್ಮದ್ ಮಿರ್ಜಾ, ವಿನಾಯಕ್ ಶುಕ್ಲಾ, ಸುಫಿಯಾನ್ ಯೂಸುಫ್, ಆಶಿಶ್ ಒಡೆದಾರ, ಅಮೀರ್ ಕಲೀಂ, ಮೊಹಮ್ಮದ್ ನದೀಮ್, ಸುಫಿಯಾನ್ ಮಹಮೂದ್, ಆರ್ಯನ್ ಬಿಶ್ತ್, ಕರಣ್ ಸೋನಾವಾಲೆ, ಜಿಕಾರಿಯಾ ಇಸ್ಲಾಂ, ಹಸನೈನ್ ಶಾ, ಫೈಸಲ್ ಶಾ, ಮುಹಮ್ಮದ್ ಇಮ್ರಾನ್, ನದೀಮ್ ಶ್ರೀ ಖಾನ್, ಸಮವ ಖಾನ್, ಶಕೆ.